علق عماد متعب، نجم الأهلي السابق، على ما تردد بشأن تسبب زيزو، لاعب الأهلي، في إثارة أزمة داخل غرفة ملابس الفريق.
وقال متعب في تصريحات تليفزيونية: “الكلام اللي طالع ان زيزو بوظ أوضة اللبس كلام غلط ومش حقيقي، وأنا ضد قصة تعديل العقود دي، أنا كـ لاعب لما باجي امضي على عقد بعدد سنين معينة ببقى راضي ومبسوط بالفلوس اللي هاخدها لاعب جه بعدها خد خمس اضعاف عشر اضعاف مش قصتك انت مضيت ورضيت بالفلوس دي لما تيجي تجدد ابقى قول طلباتك لكن متقوليش تعديل وانت فاضل في عقدك سنين انا مشفتش دي في العالم كله”.
وأضاف: “أنا في 2008 كنت واخد اتنين أمم أفريقيا و3 دوري أبطال وعقدي 250 ألف جنيه مع الأهلي ولما جه أحمد حسن استاكوزا بمليون وشوية ولا فرق معايا ولا اتكلمت واحترمت تعاقدي بس قلت لما ييجي وقت تجديدي هطلب الرقم المناسب”.
وتابع متعب: “فيه ناس بتتكلم عن صفقة زيزو، يا جماعة ما زيزو ده أحسن لاعب في مصر، وانا هنا مش بتكلم عن مستواه حاليا لأن دي حالة فريق بالكامل بس بتكلم وهو في الزمالك ووقت التعاقد معاه، والناس اللي بتقول زيزو مكانش يجي الأهلي أنهي إدارة محترمة تشوف زيزو فري ومتجبوش؟ الناس دي كانت هتبقى أول ناس تلوم إدارة الأهلي لو زيزو كان فري قصادهم ومتعاقدوش معاه”.